1 Desember 2024

Sing: Ps.136:1,2,3; Ps136:19,20; Ps65:2,3; Ps42:1,5; Ps68:1,5.

Lees: Jes 41:8-20

Teks: Jes41:10

Tema: Ons hoef niks te vrees nie want God sal sy kinders bewaar.

Tema: Ons hoef niks te vrees nie want God sal sy kinders bewaar.

Die uitverkiesing van die Here

Dit wil vir ons dikwels voorkom of ons in ‘n hopelose situasie is. Sommige mense voel daar is geen hoop om in ons lewe te volhard nie, met die gevolg dat ‘n gees van moedeloosheid oor ons toesak. Die Here wil egter dat ons nie teen ons omstandighede vaskyk nie, maar ons ook op Hom gerig hou. Israel kon in in die moeilikste van omstandighede ook hulle oog gerig hou op die Here wat verlossing gee. In die midde van hulle donkerste uur van ballingskap kan hulle verseker weet dat hulle aan die Here behoort

Die beskerming van die Here

Die feit dat Israel die volk is wat die Here as sy eiendom uitgekies het, bied aan hulle ‘n besondere troos. Hulle hoef nie besorgd oor die toekoms te wees nie en hulle hoef nie angstig te wees nie, want die Here is die een wat hulle versorg. Hy is nie vêr van sy kinders af nie, want hy het in hulle midde kom woon en maak met hulle bemoeienis. Hy het ook sy reddende regterhand aan hulle  openbaar. Dit getuig van die Here se krag en almag waarmee hy sy kinders bewaar. In Christus het die Here so naby aan ons gekom.

Die oorwinning deur die Here

Die troos van die Here se nabyheid het ‘n wonderlike effek vir die volk. Die Here sal sy oorwinning en sy seëninge aan sy volk bekend maak. Hulle sal versterk word en in die oorwinning deel. Dit is die genade wat die kinders van die Here in die gawe van Christus ontvang het. Ons Here Jesus Christus het die magte van die Satan oorwin sodat ons nou daarin kan deel. Hy het die dood vernietig sodat ons nou in Hom kan lewe. In hierdie nuwe lewe wat ons in Christus ontvang het, ontvang ons die Here se seëninge.

24 November 2024

Sing: Ps. 107:1,2; Ps. 107:10; Ps. 38:1,8; Skr. 8:1,2; Ps. 149:1,2.

Lees: Luk 15:25-32

Teks: Luk 15:31-32

Tema: Deur Christus se versoening die kan ons vrolik wees vir die lewe wat ons ontvang.

Die seëninge waarop ons aanspraak maak

Die oudste seun is die derde karakter wat in die gelykenis van die verlore seun na vore kom. Hy verteenwoordig die Fariseërs en die Skrifgeleerdes wat aanstoot neem omdat Christus met die tollenaars en die sondaars meng. Hulle neem aan dat hulle in ‘n nabye verhouding met die Here leef bloot omdat hulle die besondere volk van die Here is. Hulle ag hulle self meer as die sondaars wat rondom hulle is en reken dat daardie ander nie in die seëninge mag deel wat die Here gee nie.

Die herstel wat Christus gee

Die genade wat die vader aan die jonger broer betoon het eis dat die ouer broer juis sal verstaan dat die vader genadig is oor wie hy genadig wil wees. Die gesprek wat die ouer broer met ‘n ander dienskneg het verkondig die wonderlike genade wat die vader aan die jonger seun betoon het. Hy het weer teruggekom. Die genade wat die Here aan ons gee in Christus gaan ons menslike verstand te bowe, want die gawe van die Here se genade is nie afhanklik van ons optrede nie.

Die blydskap waarin ons deel

Die seun word nou ook opgeroep tot blydskap want hier in hulle midde het iets besonders gebeur. Sy broer wat verlore was en in die dood was het weer lewend geword. Dit gee aanleiding tot vrolikheid en blydskap vir die gelowiges. Dit is nie net in die hemel wat daar blydskap is oor die sondaar wat tot bekering kom nie, maar ook hier op aarde. As gelowiges moet ons in hierdie blydskap met mekaar deel.

17 November 2024

Sing: Ps. 18:1,2; Ps. 18:14; Ps.25:2,7; Skr. 33:1,2; Ps. 23:3; Ps. 116. Ps. 33:1,5.

Lees: Luk 15:11-24

Teks: Luk 15:24

Tema: Christus het ons deur sy dood die lewe gegee sodat ons naby aan ons Vader en aan mekaar kan leef.

Die ellende van die dood

Die hartseer implikasie van die mens se sondeval was dat daar ‘n verwydering tussen ons en God en in al ons verhoudings gekom het. In die gelykenis van die verlore seun leer Christus sy dissipels en die Skrifgeleerdes wat die gevolge van hierdie werklikheid is. Die jongste seun gaan ver weg van sy ouerhuis af en verkwis sy erfdeel in ‘n ander land. Eindelik bevind hy homself in omstandighede wat vir hom soos die dood is. Met opregte berou keer hy terug na die vader huis sodat hy hom weer kan  dien. Wanneer ons voorberei om na die Nagmaal van die Here te kom moet is dit nodig dat ons sal verstaan watter geweldige gevolge die sonde in ons lewe het. Ons sondige natuur het verwydering tussen ons en die Here gebring

Die genade van die lewe 

Wanneer die Seun in sy sondebesef na sy vaderhuis terugkeer weet hy dat dit menslik nie moontlik is dat hy weer in die dieselfde posisie sal wees as voorheen nie. Daarom sal hy te vrede wees om maar net ‘n dienskneg te wees. Die vader van die huis is egter meer genadig as wat ons dink menslik moontlik is. Hy het gewag dat sy seun sal terug kom en hom eindelik verbly toe hy hom sien. Hy herstel sy posisie as sy kind dadelik en gee opdrag dat ‘n fees gereed gemaak moet word. Hierdie seun wat dood was lewe weer en nou het hy weer teruggekom na sy vader toe. Wanneer ons nou aan die nagmaal tafel aansit is die genade van Christus vir ons geopenbaar want deur sy dood lewe ons en kan ons deel in die fees wat ons Vader vir ons berei het.

10 November 2024

Sing: Ps. 145:1,2,3; Ps. 145:8; Ps. 102:1,8; Ps. 9:1,5,7; Ps. 100:1-4; Belydenis van geloof; Ps. 134:4.

Lees: Rom. 10:1-21

Teks: Rom. 10:9

Tema: Ons glo en bely die eenvoudige evangelie dat Christus die dood oorwin het

Die inhoud van ons belydenis

In die brief aan die Romeine is Paulus besig om die rykdom van die evangelie aan hierdie gemeente uiteen te sit. Dit is belangrik dat hy ook beklemtoon dat die heidene en Israel nie op verskillende maniere gered word nie. Israel het wel die wet ontvang en is die verbondsvolk van die Here, maar daar is ook alleen deur die verdienste van Christus vir hulle redding. Die Here se kinders kry alleen deur die geloof deel aan hierdie saligheid.

Die roeping van ons belydenis

Die kinders van die Here wat die eenvoudige goeie nuus van die evangelie met die hart glo, sal dit ook met die mond bely. Hierdie belydenis is ‘n getuienis van dit wat Christus aan die kruis gedoen het en die prys wat Hy betaal het. Hierdie belydenis van ons word voortgebring deur die bediening van die Woord wat ons elke Sondag hoor. Die Here stuur die predikers en gee die gawes sodat ons in die geloof kan groei en met sekerheid Christus kan bely.

Die gevolg van ons belydenis

Die gevolg van ons geloof en belydenis is vir ons tot redding. Ons moet verstaan dat dit nie ons geloof is wat ons red nie, maar Christus wat aan die kruis gesterf het en uit die dood opgestaan het. Deur die geloof kry ons daaraan deel en met ons belydenis getuig ons daarvan in dankbaarheid. Hier word ook ‘n dringende waarskuwing gerig, want Israel het te midde van die verkondiging wat hulle gehoor het, nie ag gegee op die evangelie nie en eindelik Christus verwerp.

3 November 2024

Sing: Ps. 91:1,6; Ps. 91:8; Ps. 65:2,3; Ps. 34:1,3,8; Ps. 33:6,11

Lees: Matt. 15:21-28

Teks: Matt. 15:28

Tema: Ons groei in afhanklikheid van Christus deur beproewing in die geloof.

Die oënskynlike stilte van Christus.

Dit is die wil van die Here dat ons voortdurend in die geloof sal groei sodat ons meer die gestalte van Christus sal vertoon. Hy bewerk hierdie groei op verskillende maniere, maar ook deur beproewing. In die ontmoeting wat tussen die Kananese vrou en Christus plaasvind sien ons hoe haar beproewing haar al hoe meer en dringender in die geloof aan Christus vasgryp. Haar hulpkreet word egter met stilte begroet. Dikwels voel dit ook vir ons of ons gebede na God met stilte begroet word.

Die oënskynlike verwerping deur Christus.

Eindelik word die stilte gebreek en Christus gee ag op haar geroep, maar die antwoord van ons Here is amper meer skokkend as wat die stilte was. Dit wil voorkom of Hy haar geheel en al verwerp, asof Hy geen ag op haar kreet gaan gee nie. Die tyd het egter nog nie aangebreek dat die woord en daadprediking van Christus na die nasies uitbrei nie. Hy het vir die skape van Israel gekom en die seëninge van gesondmaking is vir sy volk bedoel. Ons is nie geregtig op die genade van die Here nie, want ons is maar ellendig in ons sonde.

Die seker gawe van Christus.

Op hierdie stadium wil dit voorkom of sy maar moet moed opgee en haar beproewing self deurworstel. Maar sy volhard om by die Here te pleit want Hy is haar enigste hoop. In Christus se antwoord aan haar bevestig hy die grootsheid van haar geloof en haar dogter word gesond. Hierdeur leer die Here sy dissipels dat Hy inderdaad gekom het om Israel te red maar dat dit ook aan de heidene gegee sal word. Die gawe van geloof is vir die vrou en haar dogter bestem. Dit is die rykdom van sy gawes wat Hy gee.

27 Oktober 2024

Sing: Ps. 92:1,2; Ps. 92:5 Ps. 130:1,2,4 Skr. 31:1,3; Ps. 46:1,4,6.

Lees: Psalm 11

Teks: Psalm 11:3

Tema: Te midde van bose aanslae sal die Here sy regverdigheid en genade openbaar.

Hopeloosheid van die bose aanslag

Psalm 11 is n gedig van Dawid wat hy in die midde van diep beproewing en geweldige aanslae onder inspirasie van die Heilige Gees geskryf het. In die midde van die aanslae wat hy beleef vind hy altyd sy skuiling by die Here. Hy het egter nie alleen in die lewe gestaan nie en dikwels het hy raad van sy vriende en raadgewers ontvang. Hulle raad is nou vir hom dat hy moet vlug en homself een beskerm. Die fondament word omgegooi en dan kan niemand meer iets doen nie. dikwels voel ons hopeloos in die midde van aanslae wat ons beleef.

Sekerheid in die Here se koningskap

Die kind van die Here bly nie in die midde van die aanslae vasgevang in hopeloosheid nie, maar kan die geloofsoog op die Here rig. Dit is immers daarin Dawid ware troos en versterking vind. Die wete dat hy altyd sy toevlug tot die Here kan neem is die fondament van sy vertroue. Die Here is koning en Hy is op sy troon vanwaar hy alles in die skepping onderhou en regeer. Die Here is die Alsiende en die Alwetende in die midde van ons lewe. Daarom het ons die sekerheid dat daar niks is wat met ons gebeur wat nie in die Here se

raad bestaan nie.

Oordeel en genade voor die Here se aangesig

Die Here sien egter nie net ons beproewings nie, maar Hy tree ook daarin op. Hy tree op teen die goddeloses en maar ook vir die regverdiges. Die Here sal sy regverdige oordeel bring oor almal wat hulle teen die kinders van die Here vergryp, maar Hy sal ook genade aan die regverdiges betoon. Deur die verdienste van Jesus Christus het ons die sekerheid dat ons weer voor die aangesig van die Here kan leef. Daarom kan ons altyd ons toevlug na Hom neem.

20 Oktober2024

Sing: Ps. 150:1,3; Ps. 107:1; Ps. 25:6,7; Ps. 71:1,2; Ps. 118:1,2

Lees: Matt 16:13 13-23.

Teks: Matt 16:17 17-19.

Tema: God bou sy gemeente onvernietigbaar op die belydenis van Jesus Christus sy Seun.

God openbaar Christus.

In die omwandeling van Christus op aarde het Hy deur sy woorde en dade

verkondig dat die koninkryk van God naby gekom het. Christus is die

gesalfde wat as koning in die ryk van die Vader optree. Met hierdie tema in

gedagte vra Christus nou sy dissipels wie hulle sê Hy is. Petrus antwoord

duidelik dat Hy die Christus is, die een wat as gesalfde kom om die

koninkryk van God te vestig en te herstel. Hierdie belydenis van Petrus is

nie iets wat hy self bedink het of wat ander aan hom vertel het nie, maar

dit is wat die Vader deur sy Gees aan sy kinders openbaar. Die wat hierdie

openbaring ontvang is salig.

Christus bou sy gemeente.

Die gevolg hiervan is dat Christus sy gemeente op hierdie hoeksteen van

Petrus se belydenis sal bou. Die rots weerspieël ook in die naam wat Petrus

ontvang. Dit is nie omdat hy ʼn besondere persoon is nie, maar omdat hy

begenadig is om die openbaring van Christus as die seun van God kon

ontvang. Die bouwerk van Christus dra ook ʼn besondere karakter in die

wete dat sy bouwerk onvernietigbaar is. Hy sal die werke van sy hande nie

laat vaar nie en hy bewaar en beskerm sy gemeente in tot by die

wederkoms. Hy is die hoeksteen en waar die waarheid van sy evangelie

woord verkondig word sal die kerk altyd onder die beskerming van

Christus wees.

Die gemeente hanteer die sleutels van die koninkryk.

Wanneer ons hierdie dinge hoor mag ons moontlik onder die indruk wees

dat die gemeente eintlik passief in sy eie bestaan is. Ons mag moontlik

dink dat ons maar net rustig met ons lewe kan voortgaan want hierdie

gemeente sal tog altyd bestaan. Christus leer egter dat Hy in sy bouwerk

juis die sleutels van die koninkryk aan sy kerk gee. In die eerste plek wys

dit op die geweldige roeping van die ampsdraers om in gehoorsaamheid

aan die Here se woord in die midde van die gemeente te regeer, maar dit

wys ook op die verantwoordelikheid van elkeen van ons oor mekaar te

waak en mekaar met die waarheid van die evangelie te bedien.

13 Oktober 2024

Sing: Ps. 105:1,3; Ps. 105:4; Ps. 25:1,3; Ps. 115:1,7,8; Ps. 71:1,9,10.

Lees: Deut. 3:21-29

Teks: Deut. 3:26

Tema: Die Here voer sy raad deur al is sy antwoord nee op ons gebede.

Die versoek

Moses is die man wat deur die Here uitgekies is om sy volk uit die slawehuis van Egipte uit te lei, deur die omswerwinge van die woestyntyd deur te lei, maar hy mag nie die volk die beloofdeland in lei nie. Die rede hiervoor is eerstens omdat hy nie gehoorsaam aan die Here was by die waters van Meriba toe hy die rots geslaan het nie. Te midde van die feit dat hy die volk nie mag inlei nie het hy in die gebed telkens tot die Here gesmeek. Ons bid dikwels met goeie bedoelinge dat die Here tog iets sal toelaat ter wille van ons.

Die antwoord

In die geskiedenis wat Moses aan die volk vertel meld hy dat hy die Here gesmeek het om tog die land in te gaan, maar die Here het geweier. In so mate dat Hy Moses ernstig vermaan het  dat dit genoeg is en dat hy nie verder moet vra nie. Maar die Here weier nie net vanweë Moses se sonde nie, maar ook die van die volk. Moses is die middelaar wat ook verantwoording vir die volk se sonde dra, maar hy is onvolmaak en kan hulle nie van hulle oortredinge verlos nie. daarom kan hy hulle nie in die land inlei nie.

Die roeping

Tog laat die Here Moses nie net daar nie. Hy laat Moses toe om die land te sien, maar sy taak is nou om Josua te versterk en te bemoedig om die taak wat hy begin het af te handel. Eindelik openbaar die Here aan Moses dat hy nie ʼn volmaakte middelaar is nie en dat daar een na hom sal kom. Jesus Christus is die middelaar wat sy kinders uit die slawehuis van die sonde verlos het, maar ook in die ewige woning van die Vader inlei.

Sing: Ps. 75:1,2,4; Ps. 33:6; Ps. 91:1,2; Ps. 86:5,6; Skr. 24:1,5.

Lees: Heb. 9:1-14

Teks: Heb. 9:14

Tema: Christus reinig ons gewete sodat ons die lewende Here kan dien

Die offer van Christus

Die kruising van die ons Here Jesus staan in die sentrum van ons geloofslewe. Hy het aan die kruis voor ons sondes betaal en ons weer met ons Vader versoen sodat ons die ewige lewe kan hê. hierdie wonderlike verlossings feit het nie net betekenis vir ons toekoms nie, maar vir ons daaglikse lewe. In die brief aan die Hebreërs leer die Here ons hoe die Ou Testament heengewys het na Christus toe en dat al die offers wat die volk gebring het vorentoe gewys het na die een offer van Christus.

Die reiniging van ons gewete 

Soos die hoëpriester in die allerheiligste moes ingaan om op die groot versoendag die volk voor die Here te reinig het Christus dit deur sy kruisdood gedoen. Hy het ‘n eenmalige en volkome versoening vir ons bewerk, maar daarmee saam het hy ons gewete gereinig van die dooie werke. Die gewete wys hier op die innerlike gedagte van ‘n mens om te onderskei tussen reg en verkeerd. Deur die sonde is ons gewete so besmet dat ons weet ons staan skuldig voor die Here, maar Christus het dit vir ons kom verander dat ons in ware vreugde lewe

Die diens aan die Here

Wanneer die kinders van die Here se gewete deur Christus gereinig is word ons geroep om Hom dien. In ons Skrifgedeelte word die dooie werke en diens aan die lewende Here teenoor mekaar gestel. Die dooie werke waardeur die mens self probeer om God se guns te wen, baat ons niks. Dit wat ons egter as nuwe mense wat deur Christus gereinig is doen getuig van dankbaarheid en diensbaarheid aan Hom. Ons kan die Here alleen in waarheid dien omdat ons deur Christus rein gewas is en vernuwe is.